Fries | Nivo start | Femke faalt

Femke faalt is in hiel spannend boek mei in protte aksje.

1. Fertel watst de moaiste sêne út it boek fûnst yn op syn minst hûndert wurden.

2. Betink hoe’tst dy sêne it bêste útbyldzje kinst sûnder gelûd. Dêr kinst by tinke oan it brûken fan Legopopkes, tekeningen, wurden op papier, mar ek oan wat dwaan mei freonen fan dy.

3. Meitsje in stop-motionfilmke fan de sêne dy’tst útkeazen hast. Dat moat yn elts gefal in heale minút duorje.
Download in app om in stop-motion filmke te meitsjen.
Foarbylden dêrfoar binne foar Android Funmotion, of foar iOs Stop Motion.

Femke drumt yn in band. Se is net by alle bandleden populêr. Douwe Jan hat har der net sa graach by.

1. Betink trije redenen wêrom’t Douwe Jan har der net graach by hat.

2. Fynst dat Lennard goed foar Femke opkomt? Beskriuw dyn miening yn op syn minst 80 wurden.

3. Douwe Jan fynt dat Femke sels ekstra materiaal foar har drumstel keapje moat. Beskriuw wêrom’tst tinkst dat dat sa is yn op syn minst tachtich wurden. Tink bygelyks oan de finansjele situaasje by Douwe Jan thús.

4. Bist it iens mei Douwe Jan? Beskriuw dyn miening yn op syn minst tachtich wurden.

Femke faalt is in hiel spannend boek dêr’t in soad yn bart. By elts foarfal yn it boek soest in foarwerp betinke kinne. Tink bygelyks oan it petear dat Femke en Sjors middenyn de nacht hawwe. Dêr soest in kompjûterspultsje by betinke kinne.

1. Beskriuw tsien foarfallen út it boek mei elts op syn minst fyftich wurden en skriuw dy foarfallen op losse kaartsjes. Ast dizze earste fraach makke hast, hast dus tsien kaartsjes mei in foarfal derop beskreaun.

2. Betink by elts foarfal datst opskreaun hast in foarwerp. Bygelyks dat kompjûterspultsje foar it petear mei Sjors of in bioskoopkaartsje foar it earste ôfspraakje mei Lennard. Sammelje yn totaal tsien foarwerpen by dyn kaartsjes.

3. Meitsje de kaartsjes oan de foarwerpen fêst en doch dy yn in doaze. Hast no in doaze dêr’t in gearfetting fan it boek yn sit!

4. Set de foarwerpen op de folchoarder fan wannear’t de foarfallen yn it boek bard binne en meitsje dêr in oersichtsfoto fan.

Stel do wiest in freon of freondinne fan Femke.

1. Se stjoert dy ûndersteande WhatsAppberjochtjes. Wat foar ried soest Femke dan jaan yn de beskreaune situaasjes? Beskriuw dyn ried yn op syn minst fyftich wurden as wienen it WhatsAppberjochtjes.







2. Ast in echte freon(dinne) fan Femke wiest, wat soest dan fan har witte wolle no’t it boek ôfrûn is?
Skriuw fjouwer fragen op.

3. Betink antwurden dy’t Femke jaan soe op dyn fragen fan punt 2 en beskriuw it WhatsApp-petear dat jim hawwe soenen. Jou dus ek út namme fan Femke antwurd. Dit petear bestiet op syn minst út hûndert wurden.

1. Sykje út wat it ferskil is tusken fiksje en non-fiksje. Dit kinst dwaan troch op dizze site te sjen by ‘Literêre teory’ en by boarne [1].
Skriuw de belangrykste ferskillen op yn in tabeltsje mei twa kolommen ûnder de kopkes ‘fiksje’ en ‘non- fiksje’

2. Is Femke faalt fiksje of non-fiksje? Beskriuw wêrom’tst dat tinkst yn op syn minst tachtich wurden.

3. Dit boek is basearre op de aktualiteit, nammentlik de praktiken fan oplichter Gaatze B. út de Westereen. Lês it artikel oer Gaatze B. wêrfan’t de link stiet by boarne [2].

4. Hokker eleminten út it boek binne echt bard? Beskriuw twa yn op syn minst fyftich wurden per elemint.

5. Beskriuw ek twa eleminten dêr’tst wis fan bist dat it fiksje is yn it ferhaal. Tink dêrby oan de rol fan Femke. Beskriuw dy eleminten ek yn op syn minst fyftich wurden per elemint.

Feit en fiksje

In ferhaal is ‘fiksje’ as it foar in part ûntstien is út de fantasy fan de skriuwer. Wat de skriuwer fertelt hoecht net mei de realiteit yn oerienstimming te wêzen. It giet derom dat de lêzer it oannimlik fynt. In skriuwer kin yn syn ferhaal hiel wat feitlike eleminten opnimme, mar as er it ferhaal presintearret as fiksje bliuwt it in produkt fan syn fantasy. Romans binne bygelyks teksten dy’t in fiksjoneel karakter ha, ek as se hiel realistysk binne. De lêzer kin net sizze dat in roman ‘net wier’ is, mar allinne mar dat in roman ‘net oertsjûget’.

Tsjin fiksje oer stiet ‘non-fiksje’. Yn non-fiksjonele teksten hat de skriuwer de bedoeling om him te hâlden oan de realiteit. Yn sa’n gefal kin de lêzer wol sizze dat de tekst neffens him wier of net wier is.

[1] Wikipedy: fiksje en non-fiksje
[2] Avro-Tros, Artikel oer Gaatze B.

Femke har heit is altyd fan hûs. Hy hat it hiel drok mei syn wurk. Femke kin wol goed mei har heit opsjitte.

1. Sykje op ynternet wat ‘objektyf’ en wat ‘subjektyf’ betsjut. Under 'boarnen' fynst twa linkjes. Beskriuw yn eigen wurden it ferskil tusken objektyf en subjektyf yn op syn minst fyftich wurden.

2. Beskriuw watst út it boek te witten krigest oer de heit fan Femke. Meitsje dêryn ferskil tusken wat objektyf is en wat subjektyf is.

3. Jou dyn miening oer de heit fan Femke. Fynst him in aardige man of net? Wêrom? Jou twa arguminten foar dyn miening en ien tsjin dyn miening. Brûk op syn minst hûndert wurden.

Wikipedy: oer subjektyf en objektyf. Klik eventueel foar mear binnen wikipedy troch nei de Nederlânske of Ingelske Wikipedia.